Қарақалпақстан Республикасы Жоқарғы Кеңеси Президиумының қарары менен Қарақалпақстан Республикасы Министрлер Кеңесиниң жанында Республикалық терминология орайы шөлкемлестирилди. Орайдың тийкарғы штат бирлигинде 3 хызметкер, жәмийетлик кеңестеги 8 бөлимде 20 қәниге жумыс алап барыўы режелестирилген, деп хабар береди Өзбекстан миллий мәлимлеме агентлигиниң хабаршысы Есимқан Қанаатов.
Орайды шөлкемлестириўде «Мәмлекетлик тил ҳаққында»ғы Қарақалпақстан Республикасы Нызамының талапларын басшылыққа алып, миллий терминология тараўындағы жумысларды буннан былай да раўажландырыў, тәртипке салыў ҳәм унификациялаў нәзерде тутылған.
Орайдың тийкарғы мақсети менен ўазыйпалары сыпатында терминлерди анықлаў ҳәм тәртипке салыў, илимий тийкарланған терминлерди көрип шығыў ҳәм тастыйықлаў, терминологиялық сөзликлер таярлаў, заманагөй мәлимлеме технологияларын әмелиятқа енгизиў, қарақалпақ тилинде компьютер бағдарламаларын таярлаў сыяқлы мәселелер белгиленген.
Буннан былай терминология орайы қарақалпақ тили қағыйдаларын қопал түрде бузған шөлкемлердиң жуўаплы хызметкерлерине шара қолланыў бойынша усыныс бере алады.
Сайтымыздың телеграмдағы каналына ағза болың: https://t.me/karinformuz
