16-август күни жаңа орынға көширилген «Арқа автовокзал»дың ашылыў мәресими болып өтти. Бул ҳаққында Қарақалпақстан хабар агентлигиниң хабаршысы Ә.Жийемуратов хабар бермекте.
Нөкис қаласы ҳәкиминиң 2017-жыл 7-июньдеги шешими менен «NO‘KIS ARQA-BATIS TRANS» жуўапкершилиги шекленген жәмийетине Нөкис – Шымбай автомагистрал жолы бойынан 1,3 гектарлық жер орны турақлы пайдаланыў ҳуқықы менен берилди ҳәм «Автостанция имаратын ҳәм жәрдемши имаратлар» қурыў бойынша жумыслар баслап жиберилди. Қурылыс жумыслары ушын «Ҳамкор банк»тиң Нөкис филиалы тәрепинен 500 миллион сумлық кредит ажыратылып, кәрхананың өзиниң есабынан 1 миллиард сум муғдарындағы қаржы жумсалды.
– Бул жерде жолаўшылар ушын барлық қолайлықларды жаратыўға ҳәрекет еттик. Жолаўшылардың дем алыўы ушын жазда салқын, қыста жыллы орынлар, асхана, шаштәрезхана, дәрихана, азық-аўқатлық затлар дүканы, автотранспортларға техникалық-сервис хызметин көрсететуғын устаханалар ҳәм басқа да барлық қолайлықлар бар. Вокзал күнине 250 ден аслам жолаўшыға хызмет көрсете алады,-дейди «NO‘KIS ARQA-BATIS TRANS» ЖШЖның баслығы А.Мадрахимов.
Мағлыўмат ушын, Нөкис қаласы Қарақалпақстанның пайтахты болған пайытларында халқының саны 10 мың адамнан сәл көбирек болған.
Қала толысып, өткен әсирдиң 50-жыллары автовокзаллар қурылып, транспорт қатнасы тәртипке түсе баслаған. Сол жыллары арқа районлардың халқы ушын транспорт хызметин көрсететуғын «Арқа автовокзал» бурынғы «Шымбай шайхана»да, ҳәзирги Спорт комплекси жайласқан орында еди. Қала кеңейип, халқының саны 100 мыңнан артып кеткен 1979-жыллары «Арқа автовокзал» бүгинги күнге шекем хызмет етип келген ҳәзирги орнына көширилген.
Бүгинги күни болса, пайтахтымыз халқының саны 300 мыңнан аслам. Қала орайынан арқа районларға бурылатуғын сыртқы айланбаға шекемги аралықтың өзи 15 километрди қурайды.
Усыларды есапқа алып, арқа автовокзалды сол айланбаның арқа тәрепинен заманагөй көринисте қайтадан салыў ҳәм вокзалды көшириў бойынша жумыслар өткен жылы басланған еди.
Сайтымыздың телеграмдағы каналына ағза болың: https://t.me/karinformuz
