Усы жылдың 25-сентябрь күни Қарақалпақстан Республикасы Жоқарғы Кеңеси Баслығы Муса Ерниязов Казань қаласында Татарстан Республикасы Президенти Рустам Минниханов пенен ушырасты.
Татарстан Республикасы Президенти Казаньға келген Қарақалпақстан делегациясына миннетдаршылық билдирди.
- Биз Россия-Өзбекстан қатнасықларында Өзбекстан менен байланысларды раўажландырыўға бәрқулла айрықша итибар қаратып келгенбиз. Биз өз ара мәплерге тийкарланған байланысларды кеңейтиўден қуўанышлымыз, - деп атап өтти Рустам Минниханов.
Ушырасыўда саўда-экономикалық, мәдений қатнасықлар ҳәм туризм, сондай-ақ, билимлендириў тараўында бирге ислесиўди еле де раўажландырыў мәселелери додаланды.
Татарстан Республикасы Президенти мәмлекетимиздиң нефть ҳәм газ санаатының мүмкиншиликлерин жоқары баҳалады. Және парламентлер аралық бирге ислесиўди жетилистириўден мәпдар екенлигин билдирди.
Өз гезегинде, Қарақалпақстан Республикасы Жоқарғы Кеңеси Баслығы Муса Ерниязов Татарстанның экономикалық потенциалы ҳаққында айта келип, бул жерде қала экономикасының тутқан ролине ҳәм исбилерменлер ушын жаратылған имканиятларға айрықша баҳа берди. Нөкис ҳәм Казань қалалары туўысқан қалалар екенлигин атап өтти.
Ушырасыўда Рустам Минниханов Муса Ерниязовты 2019-жылы Казань қаласында өткерилетуғын «Россия-ислам дүньясы: Kazan Summit» атамасындағы халықаралық саммитте қатнасыўға мирәт етти.
Мағлыўмат ушын айтып өтиў керек, Өзбекстан ҳәм Татарстан арасында көп бағдарлы бирге ислесиўлердиң тарийхы узақ жылларға барып тақалады.
1992-жыл июль айында Өзбекстанда Татарстанның турақлы ўәкилханасы ашылған болса, 1993-жыл еки мәмлекет ҳүкиметлери арасында саўда-экономикалық, илимий-техникалық ҳәм мәдений тараўларда бирге ислесиў бойынша келисимге қол қойылды.
Өткен жылы Өзбекстан ҳәм Татарстан арасындағы сыртқы саўда айланысы 92,7 миллион АҚШ долларын қурады. Бул көрсеткиш 2016-жылға салыстырғанда 1,8 есеге көбейди.
Ислам Матеков.
Сайтымыздың телеграмдағы каналына ағза болың: https://t.me/karinformuz
