Әлийшер Әўезбаев – өз ўақтында «нокаутшы» болған қарақалпақ жигити. Әлийшер Әўезбаевтың елимиз спорт тарийхындағы орны гиреўли болып табылады.
Өйткени, ол Өзбекистан Республикасы өз ғәрезсизлигин жәриялағаннан соң 1994-жылы ғәрезсиз мәмлекет сыпатында биринши мәрте қатнасып атырған Японияның Хиросима қаласындағы XII Азия ойынларында команданың ең дәслепки алтын медалын алып, қарақалпақ жигитлериниң күш-қүдиретин дүньяға көрсетип қойды.
1994-жылы 7-октябрь күни Әлийшер Әўезбаев 91 килограммға шекемги салмақ категориясында шерек финалда қарсыласы – Неппал мәмлекетинен Радж Капур Тапалияны нокаутқа ушыратады. Ярым финалда болса қытайлы Хианг Таоны очколар есабында жеңип шығып, финалға жоллама алады. Финалда Әлийшер Әўезбаев өз қүдиретин толық көрсете алды. Қарсыласы Сауд Арабиясынан Юсуф Хавсавиди нокаутқа ушыратып, алтын медаль жеңимпазына айланады.
Әлийшер Әўезбаевтың жеңиси Өзбекистанның ғәрезсиз мәмлекет сыпатындағы қатнасып атырған дәслепки халықаралық беллесиўиндеги дәслепки алтын медалы еди. Усындай мәртебеге қарақалпақстанлы Әлийшер Әўезбаевтың ылайық болғаны сиз ҳәм бизиң мақтанышымыз болып табылады. Төменде сиз Әлийшер Әўезбаевтың мәртлигине арналған клипти тамашалаўыңыз мүмкин.
Ислам Матеков.
