Президент Германияда. Мәмлекетимиз басшысы Германияда оқып атырған жаслар менен ушырасты

Өзбекстан Президенти Шавкат Мирзиёев 20-январь күни рәсмий сапар шеңберинде Германия пайтахты Берлин қаласына келди, деп хабар берди Президент баспасөз хызмети.
Сапардың тийкарғы илажлары 21-январьға жобаластырылған. Президент Шавкат Мирзиёев Берлинде федерал президент Франк-Вальтер Штайнмайер, федерал канцлер Ангела Меркель ҳәм Бундестаг баслығы Вольфганг Шойбле менен ушырасыўлар өткереди.
Сөйлесиўлерде Өзбекстан менен Германия арасындағы сиясий пикирлесиўлерди беккемлеў, саўда-экономикалық, инвестициялық ҳәм қаржылық бирге ислесиўди раўажландырыў, мәдений-гуманитар, илим-билимлендириў ҳәм туризм тараўларындағы байланысларды жеделлестириў сыяқлы мәселелерди додалаў нәзерде тутылған.
22-январь күни Мюнхен қаласында Бавария Бас министри Маркус Зёдер ҳәм Германияның жетекши компания ҳәм банклериниң басшылары менен ушырасыўлар өткерилиўи жобаластырылған.
Германияда оқып атырған, илимий изертлеў жумысларын жүргизип атырған бир топар өзбекстанлы жаслар Берлинде Президент Шавкат Мирзиёевти үлкен қуўаныш пенен күтип алды.
Мәмлекет делегациясы жайласқан имарат алдында шын жүректен сәўбетлесиў болып өтти. Мәмлекет басшысы жерлеслеримиздиң оқыў ҳәм жумыслары, әрман-тилеклери менен қызықсынды.
«Раўажланған мәмлекетлер барлық тараўларға илимий жақтан итибар берип үлкен нәтийжелерге ерискен. Бизлер де үлкен излениўлер жолындамыз. Барлық ҳәрекетлеримиз дүнья менен тең болыўға, халқымызға мүнәсип турмыс жаратыўға бағдарланған. Реформаларды сиз сыяқлы алдынғы жаслар менен биргеликте әмелге асырамыз. Барлық ийелеген билим, «ноу-хау»ларыңызды Өзбекстанның ҳәр бир тараўы күтпекте. Қаншелли көп билимге ийе болсақ, соншелли қүдиретли боламыз», - деди Шавкат Мирзиёев.
Президент жасларды оқыў ҳәм излениўлерин табыслы тамамлап, билим ҳәм тәжирийбелерин мәмлекет раўажланыўына бағдарлаўды усыныс етти.

Ислам Матеков.

Сайтымыздың телеграмдағы каналына ағза болың: https://t.me/karinformuz