Бердақ атындағы Қарақалпақ мәмлекетлик академиялық музыкалы театрының телеграм каналында хабар берилиўинше, усы жылдың 28-январь күни Бердақ атындағы Қарақалпақ мәмлекетлик музыкалы театрында «Бизиң театр» атамасында әнжуман өткерилди. Әнжуманға театрда ислеп ҳәзирги кунде ҳүрметли дем алыстағы көркем өнер ғайраткерлери, театр хызметкерлери ҳәм Өзбекстан мәмлекетлик көркем өнер ҳәм мәденият институтының Нөкис филиалы оқытыўшылары менен студент жаслар қатнасты.
Әнжуман даўамында «Театр жолы» ҳүжжетли фильми жыйналғанлардың итибарына усынылды. Онда Қарақалпақстанға хызмет көрсеткен мәденият хызметкери Аманияз Жузимбетов, Өзбекстан халық артисти, Бердақ атындағы мәмлекетлик сыйлықтың лауреаты Нажиматдин Аңсатбаев, Өзбекстан ҳәм Қарақалпақстан халық жазыўшысы, драматург Оразбай Абдирахманов, театр бас дирижёры, Өзбекстан ҳәм Қарақалпақстан көркем өнер ғайраткери, Бердақ атындағы мәмлекетлик сыйлықтың лауреаты Қурбанбай Заретдинов ҳәм жас театр изертлеўшиси Сәўбет Пирназаровлар сөзге шығып, қарақалпақ театры ҳаққында, оның қәлиплесиў жыллары, жетискенликлери, бугинги жағдайы ҳәм келешеги ҳаққында айтып өтти.
Сахибжамал Есемуратова
