Тәжикстан ҳүкимети пуқаралар денсаўлығы ушын «қайғырып» интернет баҳаларын қымбатлатты

Тәжикстан ҳүкимети пуқаралардың денсаўлығын ойлаған ҳалда мобил байланыс ҳәм мобил интернет баҳаларын еки есеге қымбатлатты, деп хабар берди Тәжикстан Байланыс хызмети баслығы Илҳам Атаевқа тийкарланып ASIA-Plus.
«Интернеттиң баҳасы қымбатлағаннан соң адамлар оннан ақыл менен пайдалана баслайды. Ойынды азырақ ойнап, көзлерин, өзиниң денсаўлығын ойлайтуғын болады... Жасларға қараң – олар ҳәрдайым интернетте отырады», деген Атаев.
Тәжикстанда мобил байланыс ҳәм интернет ушын жаңа тарифлер 18 апрелден енгизиледи. Басылымның берген мағлыўматына муўапық, баҳалар дерлик еки есеге арттырылған: дәслеп 1 гигабайт ушын пайдаланыўшылар 3,5 доллар төлеген болса, ҳәзирде бул 6,7 долларға көтерилген.

Сахибжамал Есемуратова