Бүгин, 22-апрель күни Бердақ атындағы Қарақалпақ мәмлекетлик университети мәденият сарайында журналистика кафедрасы шөлкемлестириўиндеги «Глобалласыў процесинде ғалаба хабар қуралларының роли» атамасындағы халықаралық илимий-теориялық конференция болып өтти. Конференция Қарақалпақстан журналистикасы тарийхында биринши мәрте халықаралық дәрежеде өткерилди.
Конференцияны университет ректоры А.Реймов ашып берди ҳәм басқарып барды.
Онда «Қарақалпақ әдебияты» газетасының бас редакторы, сенатор Г.Аннақлычева «Өзбекстанда жаңаланыў процеси ҳәм журналистика», Қарақалпақстан жазыўшылар аўқамының баслығы К.Кәримов «Ҳәзирги қарақалпақ журналистикасының тийкарғы машқалалары», Украинаның Киев миллий мәденият ҳәм көркем өнер университети доценти А.Полисученко «Технологии X-Reality в мультимедийной журналистике: проблемы и перспективы», Қырғызстанның Ош мәмлекетлик университети доценти З.Маматжанова «Формирование цифровой грамотности студентов», университеттиң журналистика кафедрасы баслығы З.Оразымбетова «Заманагөй журналист кадрларды таярлаў мәселелери» атамасындағы баянатларын жасады.
Буннан соң Бухара мәмлекетлик университети профессоры Ф.Муминов, Жәҳән экономикасы ҳәм дипломатиясы университети профессоры Ф.Муминова ҳәм елимиз ғалаба хабар қураллары ўәкиллери шығып сөйлеп, халықаралық конференция жумысларына табыслар тиледи.
Конференция секцияларда өз жумысын даўам еттирди.
Ислам Матеков.
Автордың түсирген сүўретлери.
Сайтымыздың телеграмдағы каналына ағза болың: https://t.me/karinformuz
