Әдиллик министрлиги тәрепинен қойымшылықларды шөлкемлестириў, сақлаў ҳәм олардан пайдаланыў тараўындағы ҳуқықты қолланыў әмелияты үйренилди.
Министрликтиң хабар бериўинше, ҳәзирги ўақытта Өзбекстан бойынша жәми 10 457 қойымшылық бар.
Өткерилген анализлер нәтийжеси қойымшылықлардан пайдаланыў, оларды сақлаў ҳәм абаданластырыў бойынша төмендеги системалы машқала ҳәм кемшиликлер бар екенлигин көрсеткен.
Көплеген қойымшылықлар инженерлик-коммуникациялық (электр, жол ҳәм басқалар) тармақларына жалғанбаған. Мәселен, Қарақалпақстандағы 233 қойымшылық электр менен тәмийинленбеген.
Өзбекстан бойынша улыўма қойымшылықлардың 1 807 синде қайыр-садақаларды жыйнаў, есапқа алыў ҳәм олардан мақсетли түрде пайдаланыў тәртиплерине әмел етилмеген.
Қарақалпақстан Республикасының Нөкис қаласы, Хожели, Шоманай, Қараөзек районларында Абаданластырыў басқармалары тәрепинен қайыр-садақалардың келип түсиўи ҳәм олардан мақсетли пайдаланыў ҳаққында тийисли қаржы уйымларына есаплар усынылмаған.
Қойымшылықларда қайыр-садақаларды әмелге асырыў менен байланыслы шөлкемлестириў мәселелерин шешиў бойынша комиссиялар жумыслары талап дәрежесинде емес. Атап айтқанда, Қарақалпақстан Республикасының Тахтакөпир, Төрткүл районларында комиссиялар шөлкемлестирилмеген.
Ислам Матеков.
Сайтымыздың телеграмдағы каналына ағза болың: https://t.me/karinformuz
