АҚШ Мәмлекетлик департаменти менен бирге Өзбекстанда ҳәм Доминикан Республикасында инглис тили бойынша оқытыўшылардың қәнигелигин жетилистириў бағдарламасын бир неше жыллардан берли табыслы алып барып атырған қәниге Гена Беннетт Нөкис мәмлекетлик педагогикалық институтына келди.
Дәслеп институттың илимий жумыслар ҳәм инновациялар бойынша проректоры П.Калхановтың қабыллаўында болған Беннетт ханым Қарақалпақстан ҳаққындағы тәсирлери менен бөлисти. Соңынан институт оқытыўшылары менен биргеликте илимий изертлеў жумысларын алып барыў бойынша өз-ара пикир алмасты.
Ҳәзирги ўақытта шет тиллерин үйрениўге болған талап артып баратырғаны сыр емес. Әсиресе, инглис тили пүткил дүнья жүзинде илим тили сыпатында тән алынған. Сол себепли, инглис тили бойынша институттың оқытыўшыларын илимий изертлеўге кеңнен тартыў, сырт елли қәнигелер басшылығында илимий жумысларын қорғаў мәселеси күнниң баслы ўазыйпаларының бирине айланбақта. Ушырасыўда усылар ҳаққында сөз болды.
Соңынан Беннет ханым институттың барлық факультетлеринен жыйналған студентлер ушын инглис тилинде интерактив усылда семинар-тренинг өтти.
Ислам Матеков.
Сайтымыздың телеграмдағы каналына ағза болың: https://t.me/karinformuz
