Ташкентте жазыўшы Луқмон Бўрихонның «Олов тутган одам» китабының презентациясы болып өтти, деп жазады Каримов фондының facebook’тағы бетинде. Әдебий шығармада Өзбекстан Республикасының Биринши Президенти Ислам Каримовтың 1986-1989-жылларда Қашқадәрья ўәлаятындағы басқарған дәўири, «өзбек иси», «пақта иси», сол дәўирлердеги социаллық-экономикалық шәраят, миллий ғәрезсизлик идеясының туўылыўы, сондай-ақ, мәмлекеттиң биринши басшысының Өзбекстан компартиясы Орайлық комитетиниң биринши хаткери лаўазымына тайынланыўына шекемги ўақыялар сөз етилген.
Жазыўшы Луқмон Бўрихон Ислам Каримовтың келбетин әдебиятқа алып кирип, бас қаҳарманның сиясий-социаллық портретин бөрттирип көрсетиўден көре оның инсаныйлық келбетин сәўлелендириўге ҳәрекет еткен», – дейди әдебиятшы алым, «Ўзбеккино» Миллий агентлиги бас директорының биринши орынбасары Шуҳрат Ризаев.
«Ислам Абдуғаниевич тәрепинен халықтың миллий өзлигин тиклеў, ғәрезсиз Өзбекстан фундаментин жаратыў жолындағы кең көлемли ҳәрекетлер Қашқадәрьядан басланған. Мен «Олов тутган одам» романымның дәслепки бөлиминде усы процессти сәўлелендириўге ҳәрекет еттим», – дейди роман авторы Луқмон Бўрихон.
Сахибжамал Есемуратова
