Усы жылдың 24-25-октябрь күнлери Нөкис қаласында БМШ басшылығында «Арал бойы – экологиялық инновациялар ҳәм технологиялар аймағы» деп аталған халық аралық конференция болып өтеди. Әнжуманның ашылыў салтанатында БМШ Бас хаткери А.Гутерриштиң видеомүрәжатының қойып берилиўи менен басланыўы ҳәм 4 тематикадағы сессия, сондай-ақ, Арал теңизиниң қурыған ултанына саяхат режелестирилген.
Илажда 230 дан аслам, солардан 200 дан аслам сырт елли мийманлардың қатнасыўы күтилмекте. Олардың арасында БМШ Баш хаткериниң Орайлық Азия бойынша арнаўлы ўәкили Наталья Герман, Европа Аўқамының Орайлық Азия бойынша арнаўлы ўәкили Питер Буриан, БМШ Бас хаткериниң жәрдемшиси, БМШ Раўажланыў бағдарламасы администраторының арнаўлы мәсләҳәтшиси Абдулайе Дьейеу, БМШның турақлы координаторы Хелена Фрейзерлер де бар.
Конференцияда Президенттиң басламасы тийкарында Арал бойында экологиялық инновациялар ҳәм технологиялар аймағын шөлкемлестириў концепциясының жойбары додаланады. Сондай-ақ, Арал бойы аймағын «Экологиялық инновациялар ҳәм технологиялар аймағы» деп жәриялаў ҳаққындағы БМШ Бас ассамблеясының арнаўлы резолюциясын қабыл етиў, Орайлық Азияда суў ресурсларынан ақылға уғрас пайдаланыў бойынша аймақлық бағдарлама презентациясы өткериледи.
Сахибжамал Есемуратова
Сайтымыздың телеграмдағы каналына ағза болың: https://t.me/karinformuz
