Усы жылдың 10-11-ноябрь күнлери аралығында «Истиқболли авлод» социаллық-информациялық орайының шөлкемлестириўи менен Ташкент қаласында «Адам саўдасына қарсы гүресиўди заманагөй журналистикада сәўлелендириў (блоглар, веб-сайтлар, социаллық тармақлар)» атамасындағы семинар-тренинг болып өтти. Семинарға 5 ўәлаяттан – Хорезм, Әндижан, Наманган, Сурхандәрья ҳәм Қарақалпақстан Республикасынан, сондай-ақ, Ташкент қаласынан жәми 24 журналист қатнасты. Булардың қатарында Karinform.uz сайты редакторы Сахибжамал Есемуратова да қатнасты.
Семинар-тренингде бүгинги күндеги ең актуал машқалалардың бири есапланған адам саўдасы ҳәм оны заманагөй ғалаба хабар қуралларда сәўлелендириў, тийкарынан қандай инсанлар адам саўдасының қурбанына айланып атырғанлығы, елимизге қайтып келгеннен соң олардың жәмийетке қосылыўына қандай жәрдем бериў мүмкинлиги бойынша пикир алмасыўлар болды. Сондай-ақ, бундай ўақыяларды журналистлик фактлер менен қалай толықтырыў мүмкинлиги бойынша сөз етилди. Семинар-тренингде Қырғызстан Республикасынан келген тренер Алтынай Мәмбетова Қырғызстандағы тәжирийбелер менен бөлисти. Буннан тысқары, журналистлерди қайта таярлаў орайының тренери Наргис Косимова, жәмийетшилик пенен байланыслар проектиниң қәнигеси Камиль Якубовлар өзлериниң презентациялары менен қатнасты.
