Олий Мажлис Нызамшылық палатасының депутаты Расул Кушербаев өзиниң Телеграмдағы каналы арқалы «беслик» ҳәм «төртлик» стипендиялар қайтадан жолға қойылатуғынлығын мәлим етти, деп жазады «Дарё».
- Бүгин бас министрдиң орынбасары Азиз Абдуҳакимов пенен студентлерге стипендия белгилеў тәртиби бойынша ҳүкиметлик қарардың жойбарын додаладық. Көпшилик студентлердиң мүрәжатларын есапқа алған ҳалда билдирилген усыныслар да жойбардан орын алып, усы қарар қабыл етилиўи менен жақсы баҳаларға оқыйтуғын, белсенди, бес баҳасына оқып атырғанлар алдынғысындай жоқары, төртке оқып атырғанлар болса өз аты менен төртлик, үш баҳасына оқығанлар болса үшлик стипендия алыўы күтилмекте. Әпиўайыластырып айтқанда, ҳәр ким өзиниң умтылыўы ҳәм излениўине қарай стипендия алады. Жойбарда және бир қанша жақсы жаңалықлар да бар. Ең жақсысы, тез күнлерде қабылланғаннан соң билип аламыз. Несип етсе, ҳүжжет жақын күнлерде қабыл етиледи, - деп жазған депутат Расул Кушербаев.
Расул Кушербаев буннан алдын да жоқары билимлендириў системасында контракт, стипендия сыяқлы студентлер ушын әҳмийетли мәселелерде турақлылықтың жоқ екенлиги билимлендириў сапасы бир жақта қалып, студентлерде билим алыўға болған умтылыўдың болмаўына алып келиўи мүмкинлигин, 400 мың сумм ҳеш нәрсеге жетпейтуғынлығын мәлим етип, жуўапкер тәреплерге «Сиз де студент болдыңыз ба?» деген сораўды ортаға таслаған еди.
Еслетип өтемиз, 2019-2020-оқыў жылынан баслап Өзбекстандағы жоқары оқыў орынларында мәмлекетлик грант ҳәм төлемли контракт тийкарында оқып атырған барлық студентлерге бирдей 400 мың сумлық стипендия белгиленген еди.
Ислам Матеков.
Сайтымыздың телеграмдағы каналына ағза болың: https://t.me/karinformuz
