ҚҚДУ талабаси депутат бўлди

Ўзбекистон ёшлар иттифоқининг Тошкент шаҳар Кенгаши томонидан ташкил этилган «Ёшлар парламенти» лойиҳасида мазкур ўқув йилидаги Беруний номидаги давлат стипендияси ғолиби бўлган техника факультети бино ва иншоотлар қурилиши таълим йўналиши талабаси Бабур Камалов иштирок этаётгани тўғрисида аввал хабар берган эдик. Бабур ўзининг зийраклиги ва ташаббусларининг долзарблиги билан лойиҳанинг энг сўнгги босқичи бўлган «Ёшлар саммити»га йўлланма олган эди.
Шу йилнинг 17-19 ноябрь кунлари оралиғида Тошкент шаҳрида ўтказилган «Ёшлар саммити Тошкент-2017» лойиҳасида «Ёшлар тадбиркорлигини ривожлантириш ва бандлигини таъминлаш» йўналиши бўйича ўзининг ташаббуслари ва таклифлари билан иштирок этган талабамиз экспертлар гуруҳининг эътиборига тушиб, ўз қобилиятини намоён қила олди.




- «Ёшлар саммити Тошкент-2017» лойиҳасида жамоа бўлиб иштирок этиш керак эди. Мазкур босқичга ўтган иштирокчилар ичидан беш нафар талаба биргаликда «Motivation 5» жамоасини туздик. Ҳар гуруҳ аъзолари бир лойиҳани кўтариб чиқиши ва унинг аҳамиятини очиб бериши керак эди. Жамоадаги дўстларим билан маслаҳатлашиб, менинг ёшлар тадбиркорлиги ва бандлигини таъминлаш бўйича таклиф этган лойиҳамни кўтариб чиқдиқ. Улар мени жамоа сардори қилиб сайлашди. Мен бундан жудаям хурсанд бўлдим ва жавобгарликни икки ҳисса сезиниб, жамоамиз билан ғолиб бўлишга ҳаракат қилдим. Лойиҳада иштирок этган бошқа жамоаларга қараганда кўтариб чиққан ташаббусимиз ўзининг долзарблиги билан ажралиб турди ва тадбир сўнгида биз ғолибликни қўлга киритдик. Жамоамизнинг беш аъзоси билан бирга Тошкент шаҳрининг «Ёшлар депутати» бўлиш бахтига эришдик, - дейди Бабур завқланиб.




Бабур тиниб-тинчимайдиган, ўз устида қайта ишлашдан тўхтамайдиган, зийрак талабаларимиздан бири. Унинг бугунги муваффақиятини кўриб, «Қурилиш соҳасида депутат чиқмайди, деб ким айтди?» дея мақтаниб айта оламиз. Унинг бугун ёшлар депутати бўлиши келажакдаги ишларига ҳам яхши таъсир кўрсатади, дея ишонч билдирамиз.

Ислам МАТЕКОВ