Нөкис қалалық мәмлекетлик салық инспекциясының «Исеним телефоны»на пайтахтымыздағы «Көтере саўда орайы»нда картошка ҳәм пияз өнимлериниң қымбат баҳаларда сатылып атырғаны ҳаққында мүрәжат келип түсти. Бул ҳаққында ҚР Мәмлекетлик салық басқармасының мәлимлеме хызмети хабар берди.
Инспекция қәнигелери мүрәжат тийкарында саўда орайына барып жағдайды үйренгенинде, «исбилермен»ниң картошка баҳасын 4700 сум, пиязды 2800 сумнан, соның менен бирге, мәмлекетлик сынаў ҳәм сертификатластырыў орайынан тексериўден өткерилмеген өлшеў тәрезиси арқалы өнимлерди өлшеп, сатып атырғаны анықланды.
Алып барылған мониторинг даўамында бул «исбилермен»ге тийисли улыўма баҳасы 1 миллион 981,4 мың сумлық 174 кг картошка ҳәм 362 кг пияз өнимлери жумыслар нызамлы түрде өз шешимин тапқанған шекем ўақытша сақлаў ушын рәсмийлестирилип алынды.
Ислам Матеков.
Сайтымыздың телеграмдағы каналына ағза болың: https://t.me/karinformuz
