Нөкис қаласы ҳəм «жасыл» категориядағы барлық район аймақларында жөнелиссиз таксилерге жолаўшыларды тасыў хызметине рухсат берилмекте.
Бул ҳаққында Қарақалпақстан Республикасы Коронавирус инфекциясының тарқалыўына қарсы гүресиў илажларын муўапықластырыў бойынша оператив Штабының мəжилис баянламасы қабыл етилди, деп хабар берди ҚР Министрлер Кеңесиниң мәлимлеме хызмети.
Жөнелиссиз таксилерде жолаўшы тасыў ушын:
- автомобиль салонында басқарыўшы орынлығы жолаўшылардың орынлығынан пластикалық яки плёнка менен тосылған болыўы;
- автомобиль басқарыўшысы менен жолаўшының медициналық нықапта болыўы;
жолаўшылардың саны еки адамнан аспаўы ҳəм олардың автомобиль салонының артқы орынлығында жайласыўы жəне жөнелиссиз такси басқарыўшысының өз аймағында ҳəрекетлениўи белгиленген.
Соның менен бирге, баянламаға муўапық, Нөкис қаласы ҳəм «жасыл» категориядағы барлық район аймақларында шаштəрезхана ҳəм гөззаллық салонлары хызметине рухсат берилди.
Буның ушын шаштəрезхана ҳəм гөззаллық салонларында хызмет көрсетиўши адамлар жеке қорғаныў қураллары:
- медициналық халат яки комбинезон;
- медицианалық нықап (N 95 яки қабатласқан 2 əпиўайы спанбонд нықап);
- жүзди толық тосатуғын қорғаныў нықабы ҳəм медициналық нықаптан пайдаланған ҳалда «Бир хызмет көрсетиўши адам – бир қарыйдарға» принципи тийкарында белгиленген аралықты сақлаған жағдайда ислеўи талап етиледи.
Сайтымыздың телеграмдағы каналына ағза болың: https://t.me/karinformuz
