Ҳәзирги ўақытта коронавирус пандемиясы тарқалыўының алдын алыў бойынша күшейтилген карантин талаплары енгизилиўи және көплеген үгит-нәсият жумысларының алып барылыўына қарамастан пуқараларымыз бул кеселликтиң қәўпин түсинип жетпей атыр.
Ақыбетинде пуқараларымыз тәрепинен көшелерде топланып жүриў ямаса зәрүрлик болмағанда ҳеш қандай себепсиз көшеде жүриў жағдайлары, медициналық нықап тақпастан карантин талапларын бузыў жағдайлары көп ушыраспақта.
Атап айтқанда, 16 219 жағдайда пуқаралар ҳәкимшилик жуўапкершиликке тартылды (соннан 2 жағдайда жынайый жуўапкершиликке тартылған), булардың көпшилик бөлими жәмийетлик орынларда нықапсыз жүриў менен байланыслы болмақта.
Соны айрықша атап өтиў керек, пуқараларымыздың итибарсызлығы, социаллық аралықты сақламай жүриўи ақыбетинде наўқасланған 1 адам бир күнде 90 ға шамалас пуқараға кеселликти жуқтырыў жағдайлары ушыраспақта.
Әлбетте, барлық пуқараларымыз бундай жағдайлардан өзлерине тийисли жуўмақ шығарыўы шәрт, - деди Қарақалпақстан Республикасы Министрлер Кеңесиниң Баслығы Қ.Сариев халқымызға жоллаған мүрәжатында.
Сайтымыздың телеграмдағы каналына ағза болың: https://t.me/karinformuz
