Россия Федерациясы Қорғаныў министри, генерал Сергей Шойгу қарақалпақстанлы журналист қыз Айжамал Жолдасбаеваны ҒМДА мәмлекетлериниң әскерий журналистлери арасында Екинши жер жүзилик урыстағы жеңистиң 75 жыллығына арнап өткерилген халықаралық таңлаўда жеңимпаз болғаны ушын сыйлықлады. Бул ҳаққында ӨзА хабаршысы Е.Қанаатов хабар берди.
Айжамал Жолдасбаева бул таңлаўға урыс ҳәм урыс қатнасыўшылары, урыстағы ерликлери ушын Қаҳарман атағына ерискен жерлеслеримиз ҳаққында «Ватанпарвар» газетасында жәрияланған мақалалары менен қатнасқан еди.
А.Жолдасбаева 1997-жылы 23-январь күни Тахтакөпир районында туўылған. Өзбекстан жәҳән тиллери университетиниң халықаралық журналистика факультетинде оқыған. Ҳәзирги ўақытта Өзбекстан Журналистика ҳәм ғалабалық коммуникациялар университетиниң магистранты, «Зульфия» атындағы мәмлекетлик сыйлықтың лауреаты.
Оқыў менен бирге Өзбекстан Республикасы Қаржы министрлиги Пенсия қорының баспасөз хызмети баслығы лаўазымында ислейди.
Ислам Матеков.
Сайтымыздың телеграмдағы каналына ағза болың: https://t.me/karinformuz
