АҚШта 12 жаслы қыз жылдың ең жақсы жас илимпазы деп табылды

Мектеп оқыўшысы Гитанджали Рао суўдағы қорғасынның муғдарын анықлаўдың әпиўайы ҳәм арзан усылын ойлап тапты. Усы ойлап табылыў нәтийжесинде ол 2017-жылы АҚШтың ең жақсы жас илимпазы деп табылды. Бул ҳаққында BBC хабар бермекте.
Бул арқалы оқыўшы қыз 2016-жылы қорғасын менен зәҳәрленген суўдан қыйыншылық көрип атырған Мичиган штаты Флинт қаласының турғынларына жәрдемлеспекши болған. Гитанджалиде бул идея ата-анасының суўды тест таяқшасы менен тексерип көрип атырған ўақтында пайда болған.
- Бул нәтийжели усыл емес еди. Өйткени, суўдың қаншелли таза екенлигин анықлаў ушын тест таяқшасы менен бирнеше мәрте тексерип отырыў керек еди, - дейди оқыўшы.
Жас алымның ойлап тапқан қурылмасы углерод нанотүтикшелеринен исленген. Девайстағы Bluetooth арқалы тест нәтийжелерин смартфон экранынан да көриў мүмкин.
- Дәслепки тәжирийбелерим сәтсиз жуўмақланды. Бирақ, кемшиликлеримнен сабақ шығарып, жумыс алып барыўға ҳәрекет еттим. Сәтсизлик табысқа елтиўши жол екенлигин түсиндим, - дейди жас илимпаз.

Ислам Матеков.