Көшпели қабыллаўлар халық пенен жүзбе-жүз сәўбетте болыў, оларды ойландырып киятырған машқалалы мәселелерди анықлаў ҳәм тийисли тараў қәнигелери менен биргеликте аймақлардағы машқалаларды сапластырыў имканын береди. Усындай мақсетте Нөкис қаласы ҳәкими ў.а. У.Панаев, Өзбекстан Репсубликасы Президентиниң Нөкис қаласындағы Халық қабыллаўханасы баслығы А.Балтабаев, ҳәким орынбасарлары, қаладағы тийисли тараўлардың жуўаплы хызметкерлери менен биргеликте «Боз аўыл» МПЖ аймағы «Шадлы аўыл» елатындағы турғынлар менен көшпели қабыллаў өткерилди. Бул ҳаққында ҳәкимлик мәлимлеме хызмети хабар берди.
Қаладағы 45-санлы улыўма орта билим бериў мектебинде өткерилген қабыллаўда пуқаралар тийкарынан ишимлик суўы менен тәмийинлеў, электр бағаналарын алмастырыў, мектепке шекемги билимлердириў шөлкемин ашыў, дәрихана шөлкемлестириў, турғынларды турақлы жумыс орны менен тәмийинлеў, ишки жолларды реконструкциялаў мәселелери бойынша мүрәжат етти.
Хабарыңыз бар, Өзбекстан Республикасы Президенти тəрепинен 11-ноябрь күни «Қарақалпақстан Республикасын комплексли социаллық-экономикалық раўажландырыў илажлары ҳаққында»ғы ПҚ-4889-санлы қарары қабыл етилди. Соның менен бирге, Қаракалпақстан Республикасы бойынша халықтың турмыс шараятын жақсылаў ҳәм аймақларды абаданластырыў бойынша илажлар бағдарламасы ислеп шығылды. Усы ислеп шығылған бағдарламаға муўапық, Нөкис каласы бойынша 6 мәкан пуқаралар жыйынында («Жаңа базар», «Қос-көл», «Тунғыш қоныс», «Телеорай», «Қызыл қум», «Боз аўыл» МПЖ аймақларында) 2021-2023-жылларда жергиликли бюджет қаржылары есабынан 2,0 км ишки жоллар реконструкция етиледи.
Көшпели қабыллаўда да ҳәр бир мүрәжат кең түрде талқыланып, тараў басшылары тәрепинен көрип шығылды ҳәм тийисли илаж көрилетуғын болды. Аймаққа дәрихана ашыў маселесиндеги мүрәжат бойынша әмелий жумыслар баслап жиберилди. Қабыллаўға қатнаса алмаған аймақ турғынларының да үйине барылып, олардың мүрәжатлары бойынша түсиниклер берилди.
Сондай-ақ, Нөкис қаласы «Наўрыз» МПЖ аймағындағы 25-санлы улыўма орта билим бериў мектебинде усы жерде жасаўшы турғынлар менен көшпели қабыллаў өткерилди.
Қабыллаўда 15 пуқараның мүрәжаты тыңланды. Онда тийкарынан бәнтлик мәселеси көтерилип, турақлы жумыс орны менен тәмийинлеў, сондай-ақ, банктен жеңиллетилген кредит алыў, ҳаял-қызларды кәсипке бағдарлаў ҳәм оқытыў, турақлы есапқа алыў, ишки жолларды асфальтлаў, соның менен бирге, электр бағаналарын алмастырыў, жаңадан жөнелисли таксилерди жолға қойыў ҳәм басқа да социаллық мәселелер орын алды.
Көшпели қабыллаў даўамында билдирилген мүрәжатлар тийисли тәртипте үйренилип шығылып, ҳуқықый мәсләҳәтлер берилди. Жумыссыз пуқаралар дизимге алынды. Мүрәжатлардың орынланыўы қадағалаўға алынды.
Ҳәкимлик мәлимлеме хызметиниң қосымша етиўинше, Нөкис қаласы ҳәкимлигинде қала ҳәкими тәрепинен ҳәптениң ҳәр сәршемби ҳәм жума күнлери пуқараларды қабыллаўлар өткерилип келинбекте.
Сайтымыздың телеграмдағы каналына ағза болың: https://t.me/karinformuz
