Өзбекстан Жаслар ислери агентлиги Қарақалпақстан Республикалық басқармасы тәрепинен «Жас китапқумар» таңлаўын өткериў жобасы тастыйықланып, республикамыздың қала ҳәм районларында, оқыў орынларында таңлаўдың дәслепки басқышлары болып өткен еди.
Барлық қала ҳәм районларда жеңимпаз деп табылған китапқумар жаслар таңлаўдың Қарақалпақстан Республикалық басқышында билимлерин сынақтан өткерди. Бул ҳаққында агентликтиң ҚР басқармасы мәлимлеме хызмети хабар берди.
Еки күн даўам еткен таңлаўда 10 жастан 14 жасқа шекемги 17 жас, 15 жастан 19 жасқа шекемги 16 жас, 20 жастан 30 жасқа шекемги 15 китапқумар жас қатнасып, «Уллы ойшыл ҳәм жазыўшы, шайырлар» ҳәм «Көркем шығармалар билимданы», сондай-ақ, «Еркин тема» шәртлери бойынша билим және көнликпелерин көрсете билди.
Ашық ҳәм әшкаралық пенен өткерилген таңлаў нәтийжелери бойынша, 10-14 жас категориясы бойынша Нөкис қаласындағы И.Юсупов атындағы қәнигелестирилген дөретиўшилик мектеби оқыўшысы Айнура Алимжанова жеңимпаз болып, Өзбекстан Республикалық бaсқышына жоллама алды.
Бул жас категориясы бойынша 2-орынды Тақыятас районы 1-санлы улыўма билим бериў мектеби оқыўшысы Амангелдиева Мафтуна ҳәм 3-орынға Елликқала районы 4-санлы қәнигелестирилген мектеп оқыўшысы Қаландарова Ҳулкар ылайық деп табылды.
Ал, 15-19 жас категориясы бойынша Бозатаў районы 1-санлы академиялық лицейи оқыўшысы Жолдасбаева Бийбайым 271,3 балл менен сыйлы 1-орынды ийелеп, Өзбекстан Республикалық басқышына жоллама алды.
Кегейли районы 14-санлы улыўма билим бериў мектеби оқыўшысы Нурымбетова Шаҳзода 2-орынды, Хожели районы 24-санлы улыўма билим билим бериў мектеби оқыўшысы Мусаева Манзура 3-орынды ийеледи.
Сондай-ақ, қызғын түрде өткен таңлаўда 20-30 жас категориясы бойынша Нөкис районы ХББне қараслы 4-санлы улыўма билим бериў мектеби оқытыўшысы Ешмурадов Асқар Жаңабаевич сыйлы 1-орынды ийелеп, Өзбекстан Республикалық басқышына жоллама алды.
Бул жас категориясы бойынша сыйлы 2-орынды Елликқала районы ХББне қараслы 56-санлы улыўма билим бериў мектеби оқытыўшысы Рейимов Аббос Рустам улы, 3-орынды Қоңырат районы ХББне қараслы 52-санлы улыўма билим бериў мектеби оқытыўшысы Зикриллаева Шоира Абдуҳаким қызы ийеледи.
Жеңимпазлар Жаслар ислери агентлиги Қарақалпақстан Республикалық басқармасы тәрепинен таярланған «Диплом» ҳәм китаплар топламы, баҳалы саўғалар менен сыйлықланды.
Сайтымыздың телеграмдағы каналына ағза болың: https://t.me/karinformuz
