Вакцинация ўақтында кери тәсирлерден қамсызландырыў процеси ҳаққында Санитариялық-эпидемиологиялық тынышлық ҳәм жәмийетлик саламатлық хызмети баслығы Б.Юсупалиев мағлыўмат берди.
- Вакцинаның емлеўден кейин кери тәсири болыўы мүмкин ҳәм бул тәсир анықланған болса, пуқара тәрепинен Денсаўлықты сақлаў министрлигине мүрәжат бериледи. ДСМ өз гезегинде, ҳақыйқатында да бул кери тәсир вакцинадан ба ямаса басқа себеплери болған болыўы мүмкинлигин үйренеди. Соған қарай тийисли жуўмақ шығарылады, - деп айтып өткен Юсупалиев.
Егер кери тәсир болса, биринши гезекте қыстаўлы медициналық жәрдемди денсаўлықты сақлаў системасы көрсетиўи атап өтилди.
- Кери болған тәсирлерди жоқ етиў мақсетинде барлық жәрдем көрсетиледи. Бирақ, бул жерде зыянды өндириў мәселелери болыўы мүмкин. Бунда судқа мүрәжат етип, суд арқалы тийисли жумыслар әмелге асырылады. Ықтыярлы қамсызландырыўымыз бар, оны ислеўге болады. Бирақ, мәжбүрий қамсызландырыў ҳәзирше бизде жоқ, - деп мәлим еткен Б.Юсупалиев.
Ислам Матеков.
Сайтымыздың телеграмдағы каналына ағза болың: https://t.me/karinformuz
