Усы жылдың 21-март күни Қарақалпақстан Республикасы Ишки ислер министрлиги Жол ҳәрекети қәўипсизлиги басқармасының 3-көшпели топары жол-патруль инспекторы, қатардағы Данияр Қайырбаев хызмет ўазыйпасын атқарыў ўақтында қайтыс болды.
Басқарма баспасөз хызметиниң хабар бериўинше, жол-патруль инспекторы Д.Қайырбаев сол күни Мойнақ районы аймағындағы 4Р-173 автомобиль жолының 91-93-километри аралығында хызмет алып барып атырған ўақтында «УАЗ-3303» маркалы автотранспорт қуралын мәс ҳалда басқарып киятырған транспорт басқарыўшысын иркпекши болғанда басқарыўшы инспекторды дүгип кеткен. Ақыбетинде жол-патруль инспекторы дүньядан көз жумған.
Басқарма жәмәәти марҳумның шаңарақ ағзалары, туўған-туўысқанларына терең қайғырыў менен кеўил билдирген.
Ислам Матеков.
Сайтымыздың телеграмдағы каналына ағза болың: https://t.me/karinformuz
