Елимизде әмелге асырылып атырған демократиялық реформалардың баслы ҳуқықый тийкары, инсан ҳуқық ҳәм еркинликлериниң исенимли қорғалыўының кепили болып есапланған Қарақалпақстан Республикасының Конституциясы 1993-жыл 9-апрель күни қабыл етилип, бүгинге дейин бир неше мәрте өзгерислер ҳәм қосымшалар киргизилип, жетилистирилип келинбекте.
Атап айтқанда, 2021-жыл 12-февраль күни өткерилген Қарақалпақстан Республикасы Жоқарғы Кеңесиниң он бесинши сессиясында “Қарақалпақстан Республикасының Конституциясына өзгерислер ҳәм қосымшалар киргизиў ҳаққында”ғы Қарақалпақстан Республикасы Нызамы қабыл етилип, усы нызам тийкарында Конституцияға бир қатар өзгерислер ҳәм қосымшалар киргизилген еди.
Мәселен, Қарақалпақстан Республикасы Конституциясының «Биринши тараў», «Екинши тараў», «Үшинши тараў», «Төртинши тараў», «Бесинши тараў» ҳәм «Алтыншы тараў» деген сөзлердеги «тараў» сөзи «бөлим» сөзи менен, 2-статьясындағы, 15-статьяныӊ екинши бөлиминдеги ҳәмде 36-статьясы текстиндеги «адамлар» деген сөз «шахслар» деген сөз бенен алмастырылды. 70-статьяның 11-бәнти, сондай-ақ, 103 ҳәм 104-статьялар алып тасланды.
Қарақалпақстан Республикасының Конституциясы қабыл етилгенлигиниң 28 жыллығы мүнәсибети менен “Qaraqalpaqstan” баспасы тәрепинен басып шығарылған Қарақалпақстан Республикасының Конституциясында әне усы сыяқлы өзгерислер ҳәм қосымшалар сәўлеленген.
Қарақалпақстан Республикасы Жоқарғы Кеңесиниң баспасөз хызмети.
Сайтымыздың телеграмдағы каналына ағза болың: https://t.me/karinformuz
