Қарақалпақстан Республикасы Экология ҳәм қоршаған орталықты қорғаў комитетиниң 2021-жыл 10-марттағы буйрығына муўапық, Әмиўдәрья суў бассейнинде усы жылдың 10-март сәнесинен 31-март сәнесине шекем, тәбийғый суў бассейнлеринде 26-апрельден 10-июньға шекем санаат мақсетинде балық аўлаў қадаған етилди.
Комитет баспасөз хызметиниң хабар бериўинше, балықлардың уўылдырық шашыў мәўсиминде пуқаралардың балық аўлаўын қадаған етиў бойынша суў бассейнлеринде броконьерлерге қарсы гүресиў, нызамбузыўшылық жағдайлары бақланған ўақытта Экология ҳәм қоршаған орталықты қорғаў комитетиниң мәмлекетлик инспекторларына жақыннан жәрдем бериў, усы мәўсим даўамында моторлы қайықларды суўға түсирмеў, спорт-ҳәўескерлик тийкарындағы балықшылар тәрепинен киши көлемдеги кемелерден моторсыз түрде қармақлардағы илмеклердиң саны бесеўден көп болмаған жағдайда аўланыўына рухсат берилиўи ескертип өтилген.
Жоқарыдағы талаплар бузылған жағдайда ҳуқықбузарларға әмелдеги нызам ҳүжжетлерине муўапық тийисли тәртипте шаралар көриледи.
Ислам Матеков.
Сайтымыздың телеграмдағы каналына ағза болың: https://t.me/karinformuz
