Бүгин, 20-апрель күни социаллық тармақларда жол ҳәрекети қәўипсизлиги хызметкерлериниң «Дамас» автотранспортында 3 жолаўшыдан артық болмаўы кереклиги түсиндирилип атырғаны сәўлеленген видеокөринис тарқалды.
Бул жағдайға Қарақалпақстан Республикасы Транспорт министрлиги мәлимлеме хызмети анықлық киргизип, жол ҳәрекети қәўипсизлиги хызметкерлериниң ҳәрекетлери тийкарсыз екенлигин мәлим етти.
«Ҳәзирги ўақытта коронавирус пандемиясы кең тарқалыўының алдын алыў мақсетинде усы жылдың 18-апрель сәнесинен баслап карантин қағыйдалары қайтадан күшейтилди. Бул ҳаққында Бас министр басшылығындағы кеңейтилген жыйналыста мәлим етилди. Жыйналыс барысында автобусларда орынлар саны 50 процентке шекем шекленетуғыны, сондай-ақ, автобуслар саны көбейтилиўи керек екенлиги атап өтилди. Бул видеода жол ҳәрекети қәўипсизлиги хызметкериниң айтқаны тийкарсыз», - деп жазылған министрлик хабарында.
Қосымша етилиўинше, буннан былай ҳәр бир жолаўшы транспортта медициналық нықапта болыўы талап етиледи.
Ислам Матеков.
Сайтымыздың телеграмдағы каналына ағза болың: https://t.me/karinformuz
