Усы жылдың 28-апрель күни Қарақалпақстан Республикасы Жоқарғы Кеңеси Президиумының «2021-жылы Токио қаласында (Япония) болып өтетуғын ХХХII жазғы Олимпия ҳәм ХVI Паралимпия ойынларына лицензияны қолға киргизген ҳәм қолға киргизиўи күтилип атырған спортшыларды қоллап-қуўатлаў илажлары ҳаққында»ғы арнаўлы қарары қабыл етилди. Бул ҳаққында Қарақалпақстан Республикасы Жоқарғы Кеңесиниң баспасөз хызмети хабар берди.
Қарарға муўапық, 2021-жылы Токио қаласында (Япония) болып өтетуғын ХХХII жазғы Олимпия ҳәм ХVI Паралимпия ойынларына лицензияны қолға киргизген ҳәм қолға киргизиўи күтилип атырған спортшыларды сарплаған күш-қуўатын қайта тиклеўге талап етилетуғын био-витаминлер менен үзликсиз тәмийинлеў ушын зәрүр болған жәми 260 миллион сум қаржы Олимпия ҳәм миллий спорт түрлери бойынша қәнигелестирилген Нөкис жоқары спорт шеберлиги мектеби ҳәм Республикалық спорттың жеке гүрес түрлери бойынша қәнигелестирилген балалар ҳәм жас өспиримлер спорт мектебине ажыратылады.
Мағлыўмат ушын, бүгинги күнге шекем республикамыздан Токио Олимпиадасына қылышпазлық спорт түри бойынша Шерзад Мамутов ҳәм Зайнаб Дайыбекова, грек-рим гүресинде Жалғасбай Бердимуратов, дзюдо бойынша Шарапатдин Балтабаев, жүзиўден Әдилбек Юсупбаев жоллама алды.
Сайтымыздың телеграмдағы каналына ағза болың: https://t.me/karinformuz
