18-август күни Қарақалпақстан Республикасы Жоқарғы Кеңесинде Жоқарғы Кеңес жанындағы мәмлекетлик емес коммерциялық емес шөлкемлерди ҳәм пуқаралық жәмийетиниң басқа да институтларын қоллап-қуўатлаў Жәмийетлик фонды тәрепинен мәмлекетлик социаллық буйыртпа бойынша жәрияланған 4-таңлаўдың жеңимпазына сертификат тапсырылды. Бул ҳаққында Жоқарғы Кеңес баспасөз хызмети хабар берди.
Усы жыл 27-июль күни өткерилген Қарақалпақстан Республикасы Жоқарғы Кеңеси жанындағы Социаллық шериклик бойынша жәмийетлик комиссияның мәжилисинде таңлаўға келип түскен жойбарлардың мазмуны, тийкарғы мақсетлери, әмелге асырыў механизмлери ҳәм күтилип атырған нәтийжелери комиссия ағзалары тәрепинен кеңнен додаланып, «Арал алтын мийрасы» жәмийетлик бирлеспесиниң «Қарақалпақстан Республикасының аўыллық аймақларында социаллық машқалаларды шешиў ҳәм де кем тәмийинленген халық, әсиресе жаслар ҳәм ҳаял-қызларда исбилерменлик көнликпелерин қәлиплестириў ҳәм олардың бәнтлигин тәмийинлеўдеги социаллық бирге ислесиўдиң инновациялық механизмлери» атамасындағы жойбары комиссия ағзалары тәрепинен берилген даўыслар тийкарында жеңимпаз деп табылған еди.
Қарақалпақстан Республикасы Жоқарғы Кеңесиниң Социаллық-мәдений раўажланыў ҳәм жәмийетлик бирлеспелер мәселелери комитетиниң баслығы, Жоқарғы Кеңес жанындағы Социаллық шериклик бойынша жәмийетлик комиссияның баслығы Д.Қурбаниязов таңлаў жеңимпазын қутлықлап, бул жойбар келешекте елимиздиң раўажланыўына, халық ийгилигине хызмет ететуғынлығына исеним билдирди.
Сайтымыздың телеграмдағы каналына ағза болың: https://t.me/karinformuz
