Елимизде өткерилетуғын әҳмийетли сиясий процессти бақлаў ушын Қарақалпақстан Республикасына келген халықаралық бақлаўшылар 1-Қарақалпақстан округлик сайлаў комиссиясы ағзалары менен ушырасты.
Ушырасыўда Италия, Бельгия, Польша, АҚШ, Россия, Қазақстан ҳәм басқа мәмлекетлерден келген бақлаўшыларға 1-Қарақалпақстан округлик сайлаў комиссиясының баслығы У.Жалменов Қарақалпақстанда Өзбекстан Республикасы Президенти сайлаўын өткериў бойынша таярлық жумыслары ҳәм ҳәзирги ўақытта әмелге асырылып атырған илажлар ҳаққында толық мағлыўмат берди.
Атап айтқанда, Қарақалпақстан Республикасында 656 сайлаў участкасы шөлкемлестирилип, 8 мың 386 сайлаў участкаларының ағзалары тастыйықланғаны ҳаққында таныстырып өтти.
Бақлаўшылар Қарақалпақстанда неше ҒХҚ ўәкиллери аккредитациядан өткенлигин сорады. Қарақалпақстан Республикасында жумыс алып барып атырған 71 ҒХҚ ўәкиллери аккредитациядан өткерилгенлиги ҳәм сиясий процесслерди сәўлелендириўде белсене қатнасып атырғанлығы мәлим етилди.
– 1-Қарақалпақстан округлик сайлаў комиссиясының баслығы менен сәўбетлестик. Округлик комиссия баслығы аймақта сайлаўға таярлық процесслери ҳаққында толық мағлыўмат берди. Сайлаў округинде комиссия ағзалары және Баспасөз орайында жергиликли ҳәм сырт елли журналистлер ушын жаратылған шараятлар менен таныстық, - дейди ЕҚБШ Демократиялық институтлар ҳәм инсан ҳуқықлары бойынша бюросынан келген халықаралық бақлаўшы Йоахим Кецлер.
Сайлаў процесслерин бақлаў ҳәм сәўлелендириў ушын халықаралық бақлаўшылар және ҒХҚ ўәкиллериниң Қарақалпақстан Республикасына келиўи даўам етпекте.
1-Қарақалпақстан округлик сайлаў комиссиясының Баспасөз орайы.
Karinform.uz.
Сайтымыздың телеграмдағы каналына ағза болың: https://t.me/karinformuz
