Әмир Темур халықарылық фонды Өзбекстанда ҳәм халықаралық масштабта кең көлемде белсендилик көрсетип, ийгиликли басламаларды әмелге асырып келмекте. Усы ийгиликли ислердиң бири сыпатында жақында «Халықаралық Әмир Темур қайырқомлық жәмийетлик фонды»ның атқарыўшы директоры Соҳибахон Аъзамованың басламасы менен «Бердақ Ғарғабай улы» атындағы халықаралық естелик белгиси шөлкемлестирилди. Бул ҳаққында Қарақалпақстан хабар агентлиги сайтында ҚМУдың таяныш докторанты М.Баўетдинов хабар берди.
«Бердақ Ғарғабай улы» халықаралық естелик белгиси менен Өзбекстан ҳәм Қарақалпақстанда, сондай-ақ, сырт еллерде Бердақтың өмири ҳәм дөретиўшилигине айрықша итибар қаратыў, елимизде турақлылықты тәмийинлеў, оның экономикалық, сиясый-жәмийетлик, илимий, руўхый-ағартыўшылық, әдебият, көркем өнер тараўларын ҳәм қорғаныў қүдиретин күшейтиў, демократиялық реформаларды әмелге асырыў, миллетлераралық татыўлық, саламат ҳәм наўқыран әўладты тәрбиялаў ислерине мүнәсип үлес қосып киятырған барлық тараў ўәкиллери, Өзбекстан ҳәм сырт ел пуқаралары сыйлықланады.
Сыйлықланғанларға естелик белгиси менен қоса оның гүўалығы бериледи. «Бердақ Ғарғабай улы» халықаралық естелик белгиси көкиректиң шеп тәрепине мәмлекетлик сыйлықлардан кейин тағылады.
Әлбетте, жәмийетимиздиң қайсы тараўында болмасын мүнәсип мийнет етип киятырған инсанлардың мийнетин қәдирлеў – ең дәслеп, оларға қаратылған аз ғана болса да итибардан басланады. Жаңадан шөлкемлестирилип атырған «Бердақ Ғарғабай улы» атындағы халықаралық естелик белгиси болса мийнетте жең түринип, халыққа аянбай хызмет етип атырған ҳәр бир қарақалпақстанлыға айрықша руўх ҳәм күш-қуўат бағышлаўы сөзсиз.
Сайтымыздың телеграмдағы каналына ағза болың: https://t.me/karinformuz
