Өзбекстанда жаңа көринистеги 50 мың ҳәм 100 мың сумлық банкноталар шығарылыўы мүмкин. Жаңа көринистеги банкноталардың шығарылыўы пулларда заманагөй қорғаныў элементлерин қолланыў ҳәм банкноталар тематикасын уйғынластырыў менен байланыслы болыўы мүмкин. Бул мағлыўматты Орайлық банк баспасөз хызметине сүйенип, Kun.uz хабарлады. Жаңа көринистеги пуллар қашан шығарылыўы анық емес.
26-августтан баслап Өзбекстанда жаңа көринистеги 5 000 ҳәм 10 000 сумлықлар айланысқа шығарыла басланған еди. Сол ўақытта банкноталарды шығарыў пулларда заманагөй қорғаныў элементлерин қолланыў менен байланыслы екенлиги айтылған еди.
Бүгинги күнде «Мəмлекет белгиси» ДУКда модернизация ислери ушын банкноталарымызда заманагөй қорғаныў элементлерин қолланыў ҳәм ҳәр қыйлы форматларда цифрластырыў, сондай-ақ, лак жағыў имканияты жаратылды. Жәҳән əмелиятында ҳәр бир мəмлекетте банкноталардың көринислери өз алдына темаға бирлестирилген болып, бунда бизлердиң банкноталарымыз дизайнын да усы тема əтирапында бирлестириў мақсет етип қойылған. Бул тема Уллы жипек жолы ҳәм мəмлекетимиздиң əййемги тарийхына қаратылған. Мысалы ушын, бул жылдың июн айынан айланысқа шығарылған 2 000 ҳәм 20 000 сумлық банкноталардың шығарылыўы режелестирилип атырғаны ҳəм 5 000 ҳəм 10 000 сумлық банкноталар темасы Уллы жипек жолы мəмлекетимиз тарийхына арналған», – деген еди сол ўақытта Орайлық банк жуўапкери Зафар Асадов.
Меҳрибану Дәўлетмуратова
