Усы жылдың январь-февраль айларында Мәлимлеме ҳәм ғалаба коммуникациялар агентлиги тәрепинен республикалық дәрежедеги 139 шөлкем ҳәм мәкеме, Қарақалпақстан Республикасы Министрлер Кеңеси, ўәлаятлар, Ташкент қаласы ҳәм 206 район, қалалардың ҳәкимликлери баспасөз хаткерлериниң 2021-жылдың II ярым жыллығындағы жумысларының нәтийжелилиги үйренилди ҳәм Әдиллик министрлигинде дизимге алынған Режеге муўапық 10 тийкарғы критерия бойынша баҳаланды.
Рейтинг нәтийжелерине муўапық, Өзбекстан көлеминдеги 139 баспасөз хаткеринен 45 иниң жумысларының нәтийжелери жоқары деп баҳаланған болып, олар арасында 86,1 балл менен Қарақалпақстан Республикасы Министрлер Кеңеси мәлимлеме хызметиниң баслығы Азамат Әжимуратов «ТОП-5»ликтен орын алған.
Республика бойлап 57 баспасөз хаткериниң жумыслары орташа, 33 и қанаатландырарлы, ал 4 еўиниң жумыслары төмен дәрежеде деп баҳаланған.
Соның менен бирге, район ҳәм қала ҳәкимликлери кесиминде 206 баспасөз хаткеринен 14 иниң жумыслары жоқары, 97 синики орташа, 75 иниң жумыслары қанаатландырарлы, 9 ының жумыс нәтийжелери төмен дәрежеде деп баҳаланды.
Соннан, Қарақалпақстан Республикасынан Төрткүл районы ҳәкимлиги мәлимлеме хызметиниң баслығы Манзура Бекчанова 86,4 балл менен, сондай-ақ, Хожели районы ҳәкимлиги мәлимлеме хызметиниң баслығы Бектурсын Хожанов 86,3 балл менен жоқары көрсеткишке ийе болды.
Рейтинг нәтийжелери бойынша Нөкис районы ҳәм Шоманай районы ҳәкимликлери мәлимлеме хызметлериниң жумыслары қанаатландырарлы, ал Нөкис қаласы ҳәм басқа районлар ҳәкимликлери мәлимлеме хызметлериниң жумыс нәтийжелери орташа деп баҳаланған.
Ислам Матеков,
Karinform.uz.
Сайтымыздың телеграмдағы каналына ағза болың: https://t.me/karinformuz
