9-апрель күни социаллық тармақларда намәлим ҳаялдың жас балаларға азап берип атырғаны сәўлеленген видеокөринис тарқалды ҳәм кең түрдеги пикир-таласларды, наразылықларды келтирип шығарды.
Видеода ҳаял кишкене балаларға күшли басым өткерип атырғаны, ақыретлегени, ҳәттеки қол көтергени сәўлеленген.
Жағдай бойынша Ишки ислер министрлиги мәлимлеме хызмети рәсмий мағлыўмат берди.
Атап өтилиўинше, 29-март күни Хожели районында жасайтуғын пуқара А.А. районлық ИИБ баслығының атына арза менен мүрәжат етип, 2021-жылдың июль айларынан баслап өмирлик жолдасы менен арасындағы өз ара келиспеўшилик себепли ҳаял өзиниң ержетпеген еки қызын урып, оларға азап берип киятырғаны, сол себепли оған нызамлы шара көриўге әмелий жәрдем бериўди сораған.
Соның менен бирге, усы жылдың 9-апрель күни социаллық тармақларда тарқалған видеокөринисте ҳаял тәрепинен өзиниң ержетпеген перзентлери 2017-жылы туўылған Х.Ш.ны ҳәм 2019-жылы туўылған Х.А.ны ҳәр қыйлы сөзлер менен ақыретлеп, олардың қорғалмаған аўҳалда екенлигин биле турып, урып атырғаны сәўлеленген.
«Ҳәзирги ўақытта усы жағдай бойынша Өзбекстан Республикасы ЖКның 110-статьясы 2-бөлими «а, в» бәнтлери менен жынаят иси ашылып, гүманланыўшы Х.Ф.ға процессуал шеклеў шарасын белгилеў мәселеси көрилмекте»,-деп жазылған ИИМ хабарында.
Бул ўақыя бойынша Хожели районы ҳәкимлиги мәлимлеме хызмети де рәсмий мағлыўмат берип, район ҳәкимлиги ҳәм прокуратура тәрепинен айрықша қадағалаўға алынғаны, балалар ҳуқықларын қорғаў ҳәм басқа да тийисли шөлкемлер менен биргеликте арнаўлы жумысшы топар дүзилип, кешиктирип болмайтуғын жумыслар әмелге асырылып атырғанын мәлим етти.
«Нәтийжеси ҳаққында социаллық тармақлар арқалы халыққа қосымша мағлыўмат берип барылады»,-деп жазды ҳәкимлик мәлимлеме хызмети.
Ислам Матеков,
Karinform.uz.
