Бүгин, 20-июнь күнинен баслап 2022-2023-оқыў жылы ушын жоқары оқыў орынларының бакалавриат билимлендириў бағдарларына абитуриентлерди онлайн дизимге алыў басланды.
Мәмлекетлик тест орайының мәлим етиўинше, бул процессте абитуриентлер телефон номерин авторизациядан өткерип, паспорт мағлыўматлары, турақлы жасаў мәнзили ҳәм питкерген билимлендириў мәкемеси бойынша мағлыўматларды киргизиўи, сондай-ақ, жеңилликлери болған жағдайда, оларды тексериўи ҳәм шет тилинен миллий ямаса халықаралық сертификатқа ийе болса, сертификат мағлыўматларын киргизиўи мүмкин.
Билимлендириў бағдарларын болса 2022-2023-оқыў жылы ушын қабыллаў параметрлериниң билимлендириў тиллери бойынша бөлистирилиўи тастыйықланғаннан соң сайлаўы мүмкин болады.
Абитуриентлерди дизимге алыў:
- Мәмлекетлик тест орайының my.dtm.uz сайты;
- Бирден-бир интерактив мәмлекетлик хызметлер порталы – my.gov.uz арқалы онлайн тәризде әмелге асырылады.
Дизимге алыў 20-июльға шекем (сол күни де) даўам етеди ҳәм абитуриентлер 20-июльға шекем өз мағлыўматларын өзгертиўи және шет тилинен миллий ямаса халықаралық сертификатқа ийе болатуғын болса, сертификат мағлыўматларын киргизиўи мүмкин болады.
Шет тилинен кәсиплик (дөретиўшилик) имтихан өткерилетуғын бакалавриат билимлендириў бағдарларына онлайн дизимге алыў болса 10-июльға шекем (сол күни де) әмелге асырылады.
Ислам Матеков,
Karinform.uz.
