Усы жылдың 20-март күни халқымыз ушын ең әзиз байрамлардан бири – Наўрыз үлкен салтанат пенен белгиленди. Ерте таңнан байрам салтанаты ҳүким сүрип, қала ҳәм аўылларда адамлар бир-бирин қутлықлаўға асықты. Көшелерде миллий нама-қосықлар жаңлап, рәңбәрең липас кийген жаслар бәҳәр байрамының заўқын сезинди.
Байрам илажларында миллий үрп-әдетлер көрсетилди, қара үйлерде үлкен дастурханлар жайылып, Наўрыз тағамлары инам етилди. Халық сейиллеринде үлкен-киши ҳәмме қуўаныш пенен қатнасты.
Наўрыз инсанларға тек ғана жаңа мәўсим емес, ал жаңа үмит ҳәм жаңа режелерди де алып келеди. Быйылғы байрам да дослық, тилеклеслик ҳәм тынышлық тымсалы сыпатында және бир мәрте ҳәммени бирлестирди. Бәҳәр нәпеси, жасарыў ҳәм жаңаланыў руўхы Наўрыз байрамында өз көринисин тапты.
Фотосүўретлер авторы: Ислам Матеков
