АҚШтың студентлик ҳәм басқа түрдеги визаларын алажақ болған адамлардың социаллық тармақлары тексериледи. Мәмлекетлик хаткер Марко Рубио коньсуллық хызметкерлерине АҚШ ҳәм Израилды сынға алыўда гүманланғанлардың социаллық тармақларын терең тексериўди буйырған. Айрықша қадағалаўға алынатуғын виза түрлери F, M ҳәм J (студентлер, кәсиплик билимлендириў ҳәм мийманға барыў ушын визалар) болып есапланады.
Төмендеги шахслардың социаллық тармақлардағы постлары пуқта тексериледи:
- Террористлер менен байланысы бар ямаса оларға тилеклеслик көрсетиўде гүман етилип атырғанлар;
- 2023-жыл 7-октябрьден (ҲАМАС Израилға ҳүжим қылған ҳәм Ғазадағы урыс басланған сәне) 2024-жыл 31-августқа шекем АҚШтың студент ямаса алмасыў бағдарламасы визасына ийе болғанлар;
- Визасы 2024-жыл октябрь айынан кейин бийкар етилгенлер.
Белгиленген сәнелер соны аңлатады, тийкарғы мақсетлердиң бири – урыс даўамында палестиналыларға тилеклеслик билдирген студентлердиң арзаларын бийкарлаў. Сондай-ақ, егер арза бериўшиниң ис-ҳәрекети ямаса мүнәсибети АҚШ пуқараларына ямаса мәдениятына қарсы болса, оған виза берилиўи бийкар етилиўи мүмкин.
