Едигениң заманында патшаның алдына бир балаға таласқан еки ҳаял келеди. Сонда патша Едигеге:
- Баланың ҳақыйқый анасын таўып бер, - дегенде, Едиге:
- Баланы қақ ортасынан бөлип екеўиңизге бөлип беремен, - дейди.
Сонда баланың ҳақыйқый анасы, баласының бөлиниўине ыразы болмай:
- Балам тири жүрсе болар, бөлмең, мына ҳаялға береғойың - деп жалынады.
Ал, екинши ҳаял болса, өзиниң баласы болмаған соң оған жаны ашымайды, үндемей турабереди. Солай етип баланың анасын Едиге анықлайды.
Топлаған: Сахибжамал Есемуратова
