Ҳәр жылы Өзбекистан Республикасы Конституциясының қабыл етилген күни алдынан елимиздиң раўажланыўы жолында экономикалық, руўхый-ағартыўшылық, илимий-техникалық тараўларда мүнәсип хызмет етип атырған ўатанласларымызға мәмлекетлик атақларды салтанатлы түрде тапсырыў дәстүрге айланған.
Өткен жылдың 7-декабрь сәнесинде Ташкент қаласында Өзбекистан Республикасы Президенти Ш.Мирзиёевтың қатнасыўында мәмлекетлик сыйлықларды салтанатлы түрде тапсырыўға арналған жыйналыс болып өткен еди.
Бул жыйналыста мәмлекетлик сыйлықлар менен сыйлықланған инсанлардың өмири, мийнетлери, қолға киргизген табыслары туўралы мағлыўматлар «Ватаннинг фидойи фарзандлари» атамасында арнаўлы китап болып басылып шықты.
Китаптан ҚМУдың 2 оқытыўшысы – Бахтияр Генжемуратов ҳәм Кәримберген Қудайбергеновлар ҳаққындағы мағлыўматлар орын алды.
Өзбекистан Республикасының илим ҳәм техника тараўындағы Мәмлекетлик сыйлығына ийе болған университеттиң математика кафедрасының баслығы К.Қудайбергеновтың «Ассоциативлик емес алгебралар, дифференциаллаў ҳәм сызықлы емес системалар теорияларын раўажландырыў» атамасындағы илимий мийнети ҳақында китапта айтылады. Бул илимий жумыста авторлардың дифференциалласқан операторлы алгебралар теориясы, ассоциативлик емес алгербалардың структуралық теориясы ҳәм динамикалық системалар теориясы бойынша изертлеўлериниң нәтийжелери келтирип өтилген.
Өзбекистан Жазыўшылар аўқамының ағзасы, «Өзбекистан Республикасында хызмет көрсеткен мәденият хызметкери» ҳүрметли атағының ийеси Бахтияр Генжемуратов туўралы айрықша келтирип өтилген. Онда «Бахтияр Генжемуратов заманагөй қарақалпақ әдебиятының көрнекли ўәкиллериниң бири. Ол өз стилине ийе қәбилетли шайыр сыпатында әдебий жәмийетшилик арасында үлкен абыройға ийе. Әсиресе, соңғы жыллары нәтийжели дөретиўшилик етип мазмунлы лирикалық қосықлар, эпикалық дәстанлар дөретти. «Қуяштың өмири», «Саратан», «Оқ қадалған ай», «Укуз дәрья битиклери», «Таңламалы шығармалар» сыяқлы поэзиялық топламларында ана ўатанға муҳаббат, садықлық сезимлери, инсаныйлық ҳәм жақсылық пазыйлетлери көтериңки руўхта жырланады» деп жазылған.
Сахибжамал Есемуратова
