Ҳиндстан: Мусылман ҳаялларға футбол көриў, салонға барыў қадаған етилди

Ҳиндстанның Уттар-Прадеш штатында мусылман ҳаялларға еркеклер футболын тамашалаў қадаған етилди, деп хабар бермекте Lenta.ru басылымы.
Қүдиретли диний ҳәм академиялық Дар уль-Улюм Деобанда атлы орайда хызмет ететуғын муфтилердиң бири Атар Касми ҳаялларға еркеклер арасындағы футболды тамашалаў қадаған етилгенин айтып өтти. Буның баслы себеби, футболшы еркеклердиң ойын даўамында ярым жалаңаш жүриўи деп көрсетилмекте. Муфтидиң айтыўынша, бул ислам дининде белгиленген постулатларға қайшы келеди. Соның менен бирге, ол ҳаялларына футбол тамашалаўға руқсат беретуғын еркеклерди сынға алды.
- Сизлерде ар, уят жоқ па? Ең болмаса қудайдан қорқсаңыз болар еди. Ҳаялларға футбол ойынларын көриўдиң не кереги бар? Ер адамлардың санына (аяғына) қарағаннан не пайда? Олар футбол ойыны былай қалып, еркеклердиң санына қарап отыратуғын болады, - деп айтып өткен Касми.
Мусылман ҳаялларының ҳуқықларын қорғайтуғын белсендилер бул сын пикирге:
- Сонда ҳаяллар теннисти де, жүзиў бойынша өткерилетуғын чемпионатларды да тамашалай алмай ма? Олардың еркеклер спортын тамашалағанында адамгершиликке жат болған қандай элемент бар? – деп өзлериниң наразылықларын билдирген.
Соның менен бирге, хабарда усы аймақта ҳаялларға гөззаллық салонларына барыў ҳәм денеге жабысып туратуғын кийимлерди кийиў қадаған етилгени хабарланды.

Ислам Матеков.