10-май күни Тәжикстан президенти Эмомалы Раҳман Рогун гидроэлектростанциясы курылысының барысы менен танысқан. Ол қурылыс жеделлигине унамлы баҳа берген. Тәжикстан басшысы биринши гезекте Вахш дәрьясының өзени иркилген жерди барып көрген. Бөгеттиң биринши бөлимин қурыў ушын зәрүрли болған топырақтың улыўмалық муғдары 2,7 миллион кубометрди қурайды. Италияның «Салини Импреджио» компаниясы дәрья өзениниң иркелгенинен берли қурылыс материалының көпшилик бөлегин – 2 миллион кубометрин пайдаланып болған. Соның менен бирге, жер астында да монтажлаў және орнатыў жумыслары жүргизилмекте. Усы күнге шекем бөгетке 47 сынақ үскенелери орналастырылған. Жойбарға муўапық, бөгеттиң иске түсиўи ушын Европадан 32,2 мың кубометр геомембрана (қурылыс материалы) алып келинген.
![](\"http://img.uz/d/2017/05/59146cf5e4cc7.jpg\")
Соның менен бирге, президент Т-22 транспорт туннелиниң қурылыс жумыслары менен де танысқан. Ҳәзирги ўақытта бул туннельдиң қурылыс жумыслары жуўмақланған.
Тәжикстанда Рогун ГЭСи бөгетиниң қурылысы (дүньядағы ең үлкен суў бөгети – 335 метр) өткен жылдың октябрь айының ақырында басланған еди. Рогун ГЭСи Вахш ГЭС каскадының тоғызыншысы болып, Душанбеден 110 километр қубла-шығыста жайласқан. Жойбарлық қуўатлылығы – 3600 МВт, орташа жыллық өндирис – 13,1 миллиард кВт/саат. ГЭС имаратында ҳәр бириниң қуўатлылығы 600 МВтқа тең болған алты дана радиал-оқлы гидроагрегат орнатылады.
Бөгет қурылып болған соң, оның артында 13,3 километр куб толық көлемге, 10,3 километр куб пайдалы көлемге ийе болған Рогун суў сақлағышы жүзеге келеди. Жойбардың толық қурып питкерилиўине 2,2 миллиард доллар, биринши гезегиниң қурып питкерилиўине 590 миллион доллар сарпланыўы айтылмақта. Рогун ГЭСиниң биринши агрегаты 2018-жылдың ақырында, екиншиси болса 2019-жылдың апрелинде иске қосылыўы күтилмекте.
