ҚМУ студентлери «Тафаккур синовлари» таңлаўының финаллық басқышына жоллама алды (+фото)

Алдын хабар бергенимиздей, Бердақ атындағы Қарақалпақ мәмлекетлик университетиниң «Еркинлик қанатлары» командасы «Тафаккур синовлари» таңлаўының Қарақалпақстан Республикалық басқышында 1-орынды ийелеп, аймақлық басқышқа жоллама алған еди.

Бүгин, яғный 20-май күни Бердақ атындағы Қарақалпақ мәмлекетлик университетиниң Мәденият сарайында таңлаўдың аймақлық басқышы болып өтти. Оған өз аймағында жеңимпаз деп табылған Бухара мәмлекетлик медицина институтының «Тараққиёт», Қарақалпақ мәмлекетлик университетиниң «Еркинлик қанатлары», Наўайы кәншилик институтының «Баркәмал әўлад» ҳәм Үргениш мәмлекетлик университетиниң «Әл Хорезмий әўладлары» командалары қатнасты.

Таңлаў бағдарламасында белгиленген 4 шәрттиң жуўмағына муўапық, Бердақ атындағы Қарақалпақ мәмлекетлик университетиниң «Еркинлик қанатлары» командасы жәми 151,5 балл топлап, жеңимпаз деп табылды ҳәм өз тарийхында биринши мәрте таңлаўдың Ташкент қаласында болып өтетуғын финаллық басқышына жоллама алды.