Арқа Корея гезектеги ракетаны ушырды

Қубла Кореялы әскерлер Арқа Кореяның ракета ушырғанын хабарлады. Бул ҳаққында Yonhap агентлигине тийкарланып, Kun.uz мағлыўмат берди.
Хабарда жазылыўынша, Қубла Корея президенти Мун Чже Ин усы мүнәсибет пенен қәўипсизлик кеңесин шақырыўға буйрық берген.
Қубла Корея штаблары баслықларының бирлескен комитети белгисиз түрдеги ракетаның Арқа Кореяның Вонсан қаласы жанынан шығыс тәрепке ушырылғанын мәлим етти. Комитеттиң хабарлаўынша, ракета 450 км аралықта ушып өткен ҳәм ол орта және киши аралықларға арналған ракета деп баҳаланған.
Токиода ракета Японияның экономикалық аймағына түскени айтылмақта.
АҚШ әскерлери де ракета ушырылғанын көрген. АҚШтың Тыныш океаны командованиесиниң (РАСОМ) мағлыўматларына қарағанда, ракета Ташкент ўақты менен 29-май күни саат 01:40 ларда ушырылған.
«Ракета Япон теңизине түскенге шекем 6 минут даўамында бақланып барылған», - деп айтылған хабарда.
«Арқа Америка ҳаўа-космослық қорғаныў командованиесиниң баҳалаўынша, Арқа Кореяның ракетасы Арқа Америкаға қәўип салмаған», - деп айтылды РАСОМ да.
Токио ракета ушырылыўы мүнәсибети менен өз наразылығын билдирди.