Футбол ўақты 60 минут болыўы күтилмекте

Футбол қағыйдаларын тәртиплестиретуғын халықаралық футбол аўқамлары кеңеси – IFAB футболға деген қызығыўшылықты еле де арттырыў мақсетинде «Play Fair!» (әдил ойын) деп аталған жаңаша стратегияны ислеп шықты.
Оған муўапық, шөлкем 90 минутлы «қара ойын»ға қарағанда ушырасыўлардың ўақтын «таза» 60 минутқа қысқартыўды усыныс етпекте. Бунда ҳәр бир секунд баскетбол ямаса хоккейдегидей есаплап барылады.
Сондай-ақ, IFAB дәрўазаман өз футболшысынан қайтқан топты қолы менен жәрийма майданының ишинде услап алғанында белгиленетуғын еркин соққының орнына 11 метрли пенальтиди енгизиўди усыныс етпекте.
Шөлкемниң футболға киригизиўди режелестирген тағы бир өзгериси соннан ибарат, онда топты әдейи қолы менен дәрўазаға жоллаған футболшыны ойыннан шетлетиў ҳәм керисинше, бос қалған дәрўазаға қол менен урылған голды есапқа алыў көзде тутылған.