Зульфия атындағы Мәмлекетлик сыйлықты бериў тәртиби өзгерди

Өзбекстан Республикасы Президентиниң 1999-жыл 10-июньдағы ПФ-2326-санлы «Зульфия атындағы Мәмлекетлик сыйлықты шөлкемлестириў бойынша усынысларды қоллап-қуўатлаў ҳаққында»ғы Пәрманға өзгерислер киргизиў ҳаққында»ғы Президент Пәрманы қабыл етилди. Бул ҳаққында Әдиллик министрлигиниң «Ҳуқуқий ахборот» каналы мәлим етти.
Пәрманға муўапық, Зульфия атындағы Мәмлекетлик сыйлықты Қарақалпақстан Республикасы, ўәлаятлар ҳәм Ташкент қаласы ўәкиллерине ҳәр жылы екеўден Халықаралық ҳаял-қызлар байрамы қарсаңында билимлендириў, илим, әдебият, мәденият, көркем өнер, спорт ҳәм жәмийетлик жумысларда айрықша жетискенликлерге ерискен он төрт жасқа толған ҳәм отыз жастан өтпеген қәбилетли қызларға берилетуғын;
- Улыўмалық орта, орта арнаўлы, кәсиплик билимлендириў мәкемелериниң Зульфия атындағы Мәмлекетлик сыйлығының лауреатлары болған оқыўшылары жоқары оқыў орынларының бакалавриатына, бакалавриат студентлери болса жоқары оқыў орынларының магистратурасына тийисли бағдар ҳәм қәнигелик бойынша кириў сынақларысыз мәмлекетлик грант тийкарында қабыл етилетуғын болды.
Еслетип өтемиз, сыйлық алдын ҳәр бир аймақ ўәкилине биреўден, әдебият, мәденият, көркем өнер, илим, билимлендириў тараўларындағы ҳәм жәмийетлик жумыслардағы айрықша жетискенликлери ушын 14 жастан 22 жасқа шекемги болған қәбилетли қызларға берилетуғын еди.

Сайтымыздың телеграмдағы каналына ағза болың: https://t.me/karinformuz

Ислам Матеков.