Нөкистеги қайсы жолларға светофор керек?

Светофор ҳәрекет көп болатуғын жоллардың кесилиспесине қойылатуғынлығы ҳәммемизге белгили. Пайтахтымыз Нөкис қаласында күн сайын жолларда ҳәрекетленетуғын автотранспорт қураллары көбейип баратырғанының гүўасы болып атырмыз. Усындай жағдайда қаламыздың айрым жолларының кесилиспесине светофор орнатылыўы керек. Мәселен, Гөне қала аймағындағы Сәдраддин Айний ҳәм Қарақалпақстан көшелери, 26-киши районы тәрептеги Пиржан Сейтов көшеси менен Ақмаңғыт гүзарының кесилиспеси, сондай-ақ, Пиржан Сейтов көшеси менен Мәртлик (бурынғы Орақбай Қулымбетов) көшелериниң кесилиспесинде светофорға мүтәжлик сезиледи. Әсиресе, Пиржан Сейтов көшесиниң Гөне қала аймағы тәрептен басланғынан Ақмаңғыт гүзарына шекемги аралығында 1 академиялық лицей, 1 мектеп, 5 орта арнаўлы билимлендириў мәкемеси, бирнеше саўда-сатық объектлери ҳәм киши базар бар, бирақ, бирде-бир светофор жоқ. Тийисли жол белгилери, жол «зебралары» болыўына қарамастан, көпшилик автомобиль басқарыўшылары оларға дерлик бойсынбай, тезликти ҳәдден тыс жоқарылатады. Сол себепли, усы көше менен кесилисетуғын басқа көшелер (мәселен, жоқарыдағы сөз еткен Мәртлик көшеси) де ҳәрекетленип атырған автомобильлердиң Пиржан Сейтов көшесине түсиўи қыйыншылық пайда етпекте.



Биз атларын атаған басқа көшелерде де жағдай усындай. Светофор – ҳәрекетлеримизди тәртипке салыў арқалы өмиримизди кепиллейди. Солай екен, булардың ҳәммеси пайтахтымыз турғынларының аманлығы, ден саўлығы ушын хызмет етеди.

Ислам Матеков.