Өзбекстан Көркем өнер академиясы Қарақалпақстан бөлими көргизбелер сарайында белгили ҳәм талантлы жас художниклердиң дөретпелеринен ибарат болған «108-бурылма» деп аталған көргизбе ашылды. Бул ҳаққында ӨзАның хабаршысы Есимқан Қанаатов хабар бермекте.
- Көргизбениң бундай аталыўының себеби, көргизбеден орын алған дөретпелердиң көпшилиги абстракт ойлаў бағдарында исленген, художниклердиң дөретиўшилигиндеги бурылыс болса инсанды терең пикирлеўге бағдарлайды, - дейди көргизбе шөлкемлестириўшиси, художник Бахтияр Серекеев. – Және бир себеби, көргизбе сарайымыз Нөкистеги халықтың тили менен айтқанда «108-бурылма»ға жақын жерде жайласқан.
Көргизбениң тийкарғы мақсети миллий сүўретлеў өнериниң бай мийрасын ҳәм заманагөй сүўретлеў өнериниң табысларын кең жәмийетшиликке танытыў және жас қәбилет ийелерин қоллап-қуўатлаў болып есапланады.
Сондай-ақ, көргизбеден орын алған картиналар, белгили художниклер дөретиўшилигиниң жаңа қырларын ашып береди ҳәм дебютант дөретиўшилердиң дәслепки қәдемлеринен хабардар етеди.
Көргизбе бир ай даўам етеди.
Ислам Матеков.
Сайтымыздың телеграмдағы каналына ағза болың: https://t.me/karinformuz
