Усы жылдың 12-13-июль күнлери аралығында Россия Федерациясының Сочи қаласында 17-19-жастағы көркем өнер ийелери арасында «Море не знает границ» атамасындағы халықаралық таңлаўына Әжинияз атындағы Нөкис мәмлекетлик педагогикалық институтының студенти Муҳаммед Төребеков қатнасып, биринши орын ҳәм «Миллийлигин сақлаған ел» номинациясы бойынша диплом менен сыйлықланды. Бул ҳаққында Қарақалпақстан хабар агентлигиниң хабаршысы Тәрбия Сейтназарова хабар бермекте.
Халықаралық таңлаўда М.Төребеков фольклор жөнелиси бойынша қатнасып, қарақалпақ халқының ашықлық дәстаны «Ғәрип ашық» дәстанынан үзиндилерди аламойнақ дуўтарда атқарып шықты.
Сондай-ақ, М.Төребеков усы жылдың 10-12-февраль күнлери аралығында Россия Федерациясының Екатеринбург қаласында өткерилген «Краски народов мира в проектах берега надежды» таңлаўына фольклор жөнелиси менен (таңлаўда «Саятхан-Ҳамра» дәстанын атқарып) қатнасып, гран-при жеңимпазы болған еди.
Буннан басқа да, Муҳаммед усы жылдың 4-7-январь күнлери аралығында Қазақстан Республикасының Астана қаласында өткерилген «АRT-PREMIUM» халықаралық таңлаўында жеңимпаз атанып, кубокты қолға киргизип қайтқан еди.
Сайтымыздың телеграмдағы каналына ағза болың: https://t.me/karinformuz
