Нөкис қаласындағы 61-санлы жөнелисли таксидиң жолы, ҳәзирги Мәртлик (алдынғы Орақбай Қулымбетов) көшеси асфальтланбақта. Жаңа асфальт узынлығы 1 км, ени 5 метр аралыққа төселиўи режелестирилген болып, жумыс дерлик жуўмақланыў алдында тур. Көшениң алдынғы аҳўалы жүдә жаман еди. Бул жерге жаңа асфальт, көшениң басына светофор сондай-ақ, көшени жақтыландырыўшы шырақлардың кереклиги ҳаққында сайтымыздағы алдынғы мақалаларда жазған едик. Мақала 61-санлы жөнелисли таксидиң тилинен жазылған болып, онда төмендегише қатарлар келтирилген еди:
«Ҳәр сапары мәнзилге жол алғанымда табаным тартпай, зорға ҳәрекетленемен. Тисимди-тисиме қойып шыдайын десем, олар бир-бирине сақыр-сақыр етип тийип, мазамды алады. Бирақ мениң саўлығымды ойлайтуғын адам жоқ. Жолларымныӊ тегис болмағаны аздай, оның үстине көшелер де қап-қараңғы. Балалығымнан түнде жүриўге қорқаман. Қәне, енди жолларымды жақтыландырыўшы нур – шырақлар болғанында өз мәнзилиме мен де, жанымдағылар да қыйналмай жеткен болар едик».
Бул мақалалардың қаншелли тәсири болғанлығын билмедик-тә, бирақ, көше асфальтланып, оның басына таза светофор орнатылды. Жақын арада шырақлардың жолларды жақтыландырып, қаладағы ең сулыў көшелердиң бири болыўына исенемиз. Бундай жаңалықлар усы аймақта жасаўшы халық ушын жаратылған және бир қолайлылық болды. Буннан ҳәмме қуўанышлы.
Көшениң алдынғы аҳўалы
Сахибжамал Есемуратова
