![](\"http://img.uz/d/2018/08/5b62bd6951510.jpg\")
Исбилерменликти қоллап-қуўатлаў, олардың жумысларын баслаўға ҳәм кеңейтип барыўға барлық қолайлық ҳәм шараятлар жаратыў бүгинниң ең әҳмийетли мәселелериниң бири болып табылады. Бул бағдарда Президентимиз тәрепинен қабыл етилген пәрман, қарар ҳәм бийликлер тараўды раўажландырып барыўға хызмет етпекте.
Президентимиздиң 2017-жыл 28-февраль күнги «Қарақалпақстан Республикасы Мойнақ районын 2017-2018-жылларында экономикалық раўажландырыў ҳәм бәнтликти тәмийинлеўге байланыслы қосымша илажлар ҳаққында»ғы қарары талапларын орынлаў бойынша Мойнақ районында жыл басынан усы күнге шекем жеке тәртиптеги исбилерменлерди қоллап-қуўатлаў бағдарында бир қатар жумыслар әмелге асырылды. Мәселен, Мойнақ районы бойынша бүгинги күнде жәми 171 өз исбилерменлик хызметлерин әмелге асырып киятырған болып, соннан, азық-аўқат ҳәм азық-аўқатлық емес өнимлерин усақлап сатыў исбилерменлик түри бойынша ҳәзирги ўақытта 135 жеке тәртиптеги исбилермен халыққа хызмет көрсетип келмекте. Оларға усы жылдың 6 айы даўамында жеке тәртиптеги исбилерменлердиң дәрамат салығы бойынша 406,9 мың сум жеңилликлер қолланылған. Сондай-ақ, халыққа турмыслық хызметлерди көрсетиў исбилерменлик түри бойынша 36 жеке тәртиптеги исбилермен жумыс алып бармақта. Район бойынша 171 жеке тәртиптеги исбилерменлерге жәми 446,7 мың сум муғдарында дәрамат салықларынан жеңилликлер берилди, -дейди ҚР МСБ бөлим баслығы Қ.Раджапов.
Салық жеңилликлери ҳәм преференциялар болса исбилерменлердиң жумысларын және де кеңейтиўге ҳәм халыққа усынылып атырған өнимлер ҳәм көрсетилип атырған хызметлер сапасын жақсылаўға хызмет етпекте.
Сахибжамал Есемуратова
